[Pilipino].[Hapon]

FREDDIE AGUILAR TITLE LOGO

HIMIG NG PILIPINAS

FREDDIE AGUILAR


Luma na sa pandinig ng mga Pilipino ang ngalang Freddie Aguilar. Mula sa anak hanggang sa ina at ama, maging mga pipi at bingi, pati na ang pulubi at mga kapus-palad, siya ang kanilang tagapagtanggol, at mula pa noon, siya na ang kanilang kakampi. Tulad ng dati, patuloy sa panenermon ang kanyang mga awitin na punung-puno ng mga mensaheng aantig sa iyong mga damdamin. Ngunit kahit ilang ulit mong mapanood ang kanyang pagtatanghal, bago at bagong Freddie ang iyong makikita.


Hindi lamang sa himig o salita ngunit maging sa gawa ay aktibo itong si Freddie Aguilar. Mula sa kanyang "Anak Foundation" ay itinatag niya ang isang paaralan ng mga batang anak ng mahihirap, sa lugar ng mayayaman sa New Manila, QC.

"9 years ago, nasunog ang isang eskuwelahan na malapit sa aming lugar sa New Manila, pagkatapos nito ay naglipana ang mga bata sa kalsada dahil wala na silang mapasukan, dito ko naisipang magtayo ng isang kindergarten upang matulungan ang mga batang hindi makapasok sa mamahaling eskuwelahan, sa atin kasi ay walang public nursery school o kindergarten. Noong una ay sa bahay namin sila nagka-klase, binigyan ko sila ng isang kuwarto doon.
Ngunit isang araw ay may dumating na isang Hapon sa Hobit House na kinakantahan ko sa Ermita, sabi niya sa akin, o, Freddie, I made a lot of money in your country because of my business, what can I do to help your foundation?
Iniabot niya sa akin ang isang brown envelope, at nang buksan ko ito pagdating sa bahay, cash pala ang laman na nagkakahalaga ng P40,000.
Dahil sa halagang ito ay napalaki ko ang eskuwelahan ng mga bata.
Matagal na nawala ang Hapong iyon at nang bumalik siya sa Pilipinas ay inimbita ko siya sa bahay at ipinakita ang kinapuntahan ng kanyang donasyon.

Tuwang-tuwa siya ng makita ang mga bata at ang eskuwelahan, at ipinagmamalaki ko sa lahat na iyon ay donasyon ng Hapon.
Ngayon ay mayroon kaming 300 mga estudyante sa QC at Bulacan, gusto ko ring magtayo dito sa Tagaytay pero hindi ko pa makakayanan ang gagastusin nito buwan-buwan.
Mayroon nang nag-donate ng building, pinaghahandaan ko na lamang ang mga kakulangan pa.
Tulad ng mga itinatag kong eskuwelahan ito ay para sa mga mahihirap.
Dito sa Tagaytay, akala mo ay puro mayayaman ang nakatira, puro mga turista, ngunit sa kabila ng mga pataniman diyan, nakukublihan ng malalagong dahon, naroon ang mga mahihirap.
Malaon nang kawikaan na ang kabataan ang pag-asa ng bayan, kung hindi natin sila tutulungan ngayon, anong mangyayari sa ating kinabukasan? Dapat ihanda nating ang mga kabataan at ito ang isang layunin ng "Anak Foundation".

Ang sitwasyon ng Pilipinas ngayon ay pareho pa rin. Sinasabing ang ekonomiya ng Pilipinas ay bumubuti, ngunit para kanino? ang mahihirap ay mahirap pa rin at ang hustisya ay hinahagilap pa rin.
Dapat pag-isipan rin natin ito.

Mga tao at kalikasan ang inspirasyon ko sa paggawa ng musika kaya naririto ang Ka Freddie's sa Tagaytay.
Sumusulat ako ng kanta base sa nakikita ko sa kapaligiran at mula sa mga mungkahi ng mga tao.
Ngayon ay ipino-promote ko ang awitin kong pinamagatang "Salot", ito ay mensahe sa malalaking Corporation, sa mayayamang bansa na nagtatangkang lumikha ng mga pag-aaway.
Ako ang Hari at nag-aaway tayo, ngunit ang nagiging biktima ay ang maliliit at mahihirap na tao.

Bakit hindi tayo maging magkaibigan at magkasundo?
Kung meron nga lang mga tao sa ibang planeta, pagtatawanan nila tayo sa nakikita nilang pagsira natin sa inang mundo. Naniniwala akong magkakaisa ang lahat at matitigil ang awayan, wala nang mang-aapak upang maging no.1.
Hindi totoong kailangan mong apakan ang iba upang manguna ka, ang kailangan ay pagsisikap at pagtutulungan. Hind baleng matagal ang paghihintay basta't matamo mo ang iyong mabuting pangarap.
Ipinaabot ko nga pala sa mga tagasubaybay ng Kumusta Magazine sa Japan na hinahangad ko ang kapayapaan at kaunlaran para sa inyong lahat at nawa'y makamit ninyo anuman ang inyong maliliit at malalaking pangarap sa buhay.

Salamat din sa inyong pagdalaw dito sa Ka Freddie's, magandang alaala sa akin tuwing may dumadalaw ditong mga Hapon."

Pinoy na Pinoy ang loob ng Ka Freddie's at bukod sa pagkanta ni Freddie, kinagigiliwan rin ng mga panauhin ang mga pagkaing Pilipino, "eastern", "western", at maging oriental.
Ganito kung magsilbi si Ka Freddie, hindi lamang para sa isa kundi para sa lahat. Ngunit ang lahat ay iisa kung ituring ni Ka Freddie.
Sa kanyang awiting pinamagatang "Dugo" ay ipinaliliwanag niya ang pagkakaisa ng lahat.
"Kahit Japanese ka o Amerikano, puti o itim, Muslim o Kristiyano, blonde man o itim ang buhok mo, iisa lang tayong lahat, kasi kung masusugatan ka, tulad ng lahat, pula ang dugong dadaloy sa iyo."

Wala na ang dating "Hobit House" ni Freddie sa Ermita at ang bagong Ka Freddie's na dinarayo ng kanyang mga kaibigan at fans ay tila isang museum. Naroon ang mga mahal niyang lumang gitara, ang marami niyang trophies at record awards, at ilang portrait na likha ng mga kaibigan niyang sikat na pintor.
Sa pagwawakas ng kanyang pagtatanghal ay nag-iimbita siya ng 2 sa audience na nais isa-awit ang kanilang istorya. Kakantahin ito ni Freddie at ibibigay sa iyo ang cassette tape bilang alaala ng iyong pagdalaw.

@

„KA FREDDIE'S IS OPEN 7DAYS from 7pm
OPEN FOR LUNCH ONLY ON SATURDAYS AND SUNDAYS
„FREDDIE'S PERFORMANCE IN TAGAYTAY:
Friday and Saturday between 10:00--11:30pm
„REGULAR SCHEDULE AT KA FREDDIE'S:
FRIDAY SATURDAY SUNDAY
Watawat Band Freddie Aguilar Maribeth Velarde
Maegan Aguilar Alvin with the Lynx Marc Velasco
Freddie Aguilar Watawat Band
„address:
KA FREDDIE'S SVD Road, San Jose, Tagaytay City, Philippines
(096)413-1993 / 413-1649

Copyright 1996 (C)KUMUSTA-MAGAZINE. All rigths reserved.
Send suggestions/comments to kumusta@jp.interramp.com